Ծովափնյա ռեստորանը, որ ընտրել էինք ճաշելու համար, նախընտրելի էր բոլորից նրանով, որ ամենամոտն էր գտնվում մեր հյուրանոցին, ուներ բարեհամբույր անձնակազմ, ուտեստներն էլ բազմազան էին ու համեղ:Գուստավո անվամբ մատուցողը իր գործն անելուց բացի սիրում էր կյանքը պատմել, սիրում էր նաև մեր կյանքով հետաքրքրվել, և դա առանձնապես դուր չէր գալիս մամային:Ամեն դեպքում մեր շփումը ռեստորանի սահմաններում սիրալիր և քաղաքավարի բնույթ էր կրում:Լինելով ավանդապաշտ լատինամերիկացի, Գուստավոն պահպանում էր իր չափը, և դեռ երկար այդպես կշարունակվեր, եթե մի օր ես առանց մենյուին նայելու սնկով ուտեստ չխնդրեի:
Զգալով, որ չի հասկանում “մաշրում” բառը անգլերենով, ես անցա ձեռքերով նկարագրելուն: Նա ինքն էլ մի քանի անգամ ցույց տվեց մոտավորապես նման մի բան` անընդհատ աղավաղած կրկնելով մաշրումը , և երկուստեք տքնաջան փորձերից հետո իբրև թե հասկացանք իրար, և նա հեռացավ:
Որոշ ժամանակ անց վերադարձավ մամայի ու քրոջս ուտեստները ձեռքին, իսկ իմ ” սնկով” ուտեստը բերեց մի քիչ ավելի ուշ, կրկնակի գրգռելով ախորժակս:
Մինչ կմոտենար, ես նկատեցի ափսեի մեջ չափից ավելի մեծ սև սնկեր, ու մտավախություն առաջացավ չթունավորվել այդ տարօրինակ իսպանական սնկից :
2 վայրկյան ևս, ու սեղանին դրվեց միդիաներով լի մի մեծ ափսե:
Մաման և ես իրար նայեցինք, որովհետև ես ծովային մթերքի նկատմամբ հակակրանք ունեի, և քանի որ մաման բացարձակապես անգլերեն չգիտեր, սկսեց ինձ համդիմանել բառը չիմանալու և ճիշտ չբացատրելու համար:Գուստավոն չհասկացավ մեր տարաձայնությունները, հարցրեց, արդյոք ամեն ինչ նորմալ է, և որպեսզի իմ ու մամայի խոսակցությանը ներկա չգտնվի, ես նրան ստեցի, թե ամեն ինչ հիանալի է, շնորհակալություն հայտնեցի, և նա հեռացավ:
Մաման առաջարկեց ուտեստը ետ ուղարկել, բայց ես լինելով ոչ կոնֆլիկտային, զոհ գնալով քաղաքավարությանը, ասացի որ կուտեմ, ու սկսեցի փորձել կյանքում առաջին անգամ այդ ոչ գայթակղիչ խխունջները:
Մի քանիսը մի կերպ կուլ տալով ես այլևս չկարողացա շարունակել, մաման էլ նկատելով դա, որոշեց փորձել, և դեմքի արտահայտությունից զգացվեց, որ ինչ-որ բան այն չէ:
-Այլևս չուտես, հում են, վրան միայն լիմոն է լցրած, կանչիր, թող մի ուրիշ բան բերի:
Ես ուժգին ծիծաղեցի, հերիք չէր այն, որ ես դրանք տհաճությամբ էի կերել, դեռ հում վիճակում էին եղել….
Գուստավոն, որ նկատել էր ամենը հեռվից, մոտեցավ մենյուն ձեռքին, ցույց տվեց անգլերեն մասսլս բառը ուտեստի նկարագրության մեջ, ես էլ լավ տնտղելով մենյուն հասկացա, որ սնկով ուտեստ ընդհանրապես չունեին:
Մաման հայերենով չզսպեց իրեն, բայց դեմքն ու ձայնի տոնայնությունը ավելին էին ասում, քան Գուստավոյի համար անհասկանալի հայերեն հանդիմանությունները:
Որպեսզի երկար չտևի տեսարանը, ես նրան խնդրեցի ամառային աղցան բերել լիմոնով ու քացախով, բայց և այնպես մամայի ազդեցությամբ պարտքս համարեցի տեղեկացնել իրենց ուտեստի ոչ կատարյալ լինելու և ինձ ճիշտ չհասկանալու մասին:
Նա էլ արդարացավ, թե սկզբից պետք էր ասել ամեն ինչ և հրաժարվել միդիաներից:
Արդյունքն եղավ այն, որ մենք այլևս այդ ռեստորանից չօգտվեցինք: